МАКЕДОНСКИ ЕКСПЕДИЦИИ КОИ СТАРТУВААТ ВО ЈУНИ 2007

Овој месец стартуваат две експедиции, и тоа: Демавенд 2007 и Елбрус 2007.
Експедицијата за Демавенд е во организација на ПСК „Бистра“ - Скопје. Ќе учествуваат вкупно 15 планинари од Скопје, Битола, Богданци и двајца планинари од Црна Гора. Стартот е предвиден за 15.06.2007 год. во 17ч и ќе трае вкупно 13 дена, поаѓањето е со автобус прво за Истанбул и потоа кон Техеран.
Втората експедиција за Елбрус која стартува овој месец е во самостојна организација на двајца планинари од Куманово, Момчило Цветковски и Кокан Новович кои не се членови на некое пл. друштво. Поаѓаат на 29.06.2007 год. со авионски превоз и ќе трае до 11.07.2007 год. Со агенција од Русија имаат договорено да користат локален водич.
Инаку Кокан Новович минатата година самостојно учествуваше и во експедицијата Лобуче 2006 во организација на Клубот на високогорците од Србија.
За жал кај нас се уште преовладува индивидуална организација на експедиции која е се разбира поскапа и како резултат не може да даде успешни македонски хималајски експедиции како оние од 80-тите години, се додека асоцијациите посебно ФПСМ не почнат да работат организирано на тоа поле. Предложувањето за одликување и спортист на годината од страна на ФПСМ на Глигор Делев е многу лесно сега откако тој без никаква помош од Македонија успеа да се искачи на Монт Еверест, зошто не реагираше воопшто кога две недели пред почетокот на експедицијата беше известен за неа?
Или можеби управниот одбор на ФПСМ не смета дека организирањето и поддршката на македонски експедиции односно наши учесници во странски експедиции, не треба да им биде дел од секојдневната работа?

MKDmount
13.06.2007