|
Поздрав од Кичево каде малку по малку ги засилуваме активностите околу домот. Ја завршивме конечно реставрацијата на кровот, а пред една недела со помош на механизацијата од едно јавно претпријатие почнавме да ги санираме оштетувањата на пристапниот пат, но за жал се случи еден дефект кој се уште не можат да го отстранат, така да се уште чекаме да го завршиме тој дел од санацијата, а потоа да се префрлиме на следниот дел - бетонирање на подните површини.
Еве и извештај од нашата  минатонеделна акција во Мариово. На покана од ПД „Козјак“ од Прилеп нашето друштво учествуваше на еднодневна тура низ Мариово во недела 17-ти септември. Стартот на турата беше закажан во с. Старавина во 8:30ч. Домаќините организираа превоз од Прилеп попатно собирајќи и планинари од Битола покрај РЕК „Битола“, но бидејќи ни беше пократко да дојдеме директно до Битола дојдовме со сопствен превоз до Старавина која е на 50-тина километри од Битола. Со турата почнавме околу 9ч упатувајќи се кон исток-југоисток по сртот на ридот по макадамски пат, а потоа 2-3 пати го скративме патот преку зарастени козји патеки. За наша среќа дождот кој накратко почна да врне го избегнавме засолнувајќи се во локалната шумска куќа. Набрзо преврна и за кратко време стигнавме до Градешничките извори каде направивме  пауза за ручек по два и пол часовното пешачење. Враќањето назад кон с. Градешница и с. Старавина беше по течението на Градешничка река при што неколку пати ја поминувавме истата преку импровизирани мостови, пристигнувајќи во с. Градешница после 2,5 часа, но мокри до гола кожа како последица од силниот дожд кој не следеше последниот час од турата. Од Старавина утрото имаше уште една група планинари кои се упатија кон с. Зович и Чебрен, но бидејќи немаше кој да го врати возилото со кое дојдовме 10 км наназад каде што турата требаше да заврши, истата ја оставивме за некоја следна прилика.
|
|
2005-2008
Сите права се задржани 