НОЌ НА ОТВОРЕНО ПОД ПОКРИВОТ НА ЕВРОПА

Битолска алпска експедиција при искачување на Мон Блан

Несекојдневна вејавица ги спречи четворицата битолски алпинисти кои на 5-ти овој месец се обидоа да го искачат највисокиот врв на Европа и да стигнат до планираното одредиште, врвот Мон Блан (4.810 мнв). Тој ден, такво нешто не им успеа и на останатите алпинисти кои јуришаа кон врвот, пред се заради неповолните временски услови. За разлика од останатите алпинисти кои се вратија во своите планинарски домови - засолништа, битолската алпинистичка четворка, Игор Радичоски, Петар Нолев, Томе Минчев и Драган Ристевски, членови на ПСК „Пелистер“, заради безбедносни причини останаа на платото на 4.400 мнв да ја дочекаат ноќта.

„Густата магла, која дозволуваше видливост од неколку метри, силниот ветер и студеното време со зимски температури беа наши противници таа вечер и ноќ“ - изјави водачот на експедицијата Драган Ристевски и додаде,
„затоа бевме принудени, со голема присебност да ископаме две зимски игла во тврдиот снег и некако да ја поминеме студената алпска ноќ под Мон Блан, да ја дочекаме муграта на 6 август, и бавно да го продолжиме патот кон врвот.“

А тој ден, во раните утрински часови нашата алпска експедиција меѓу првите успеа да се искачи на покривот на Европа и покрај видливите последици од студот и почетните смрзнатини по екстремитетите на нашите алпинисти, по што на врвот го развиори македонското национално знаме.

Инаку, алпинистичката патека на искачуавање на битолските алпинисти била од француска страна, почнувајќи од Шамони, Еги ди Миди, Космик и врвот Мон Блан, додека враќањето било преку Валот, Де Гуте и Тетрус, и до базниот камп во Шамони.

Текст и фотографии: Радичоски Игор


27.08.2008