И СЕ СЛУЧИ    КАЊОН - СПОРТ

Повеќе години во Европа и во светот постои и се развива кањон-спортот како самостојна спортска гранка. Како понова „дисциплина“, има се повеќе приврзаници, па разбирливо е и интересирањето во нашата земја.
Станува збор за еден од високоризичните спортови, кој се одвива во непристатни кањони со цел за продирање низ нив и совладување на сите природни пречки на кои ќе се наиде во просторот.
Кањон-спортот технички е многу блиску до спелеолошката и алпинистичката техника, бидејќи опремата што се употребува е слична, а во делови идентична. Тоа е еден атрактивен спорт, каде со одредена техника на спуштање со јаже се совладуваат сите каскади во кањоните, најчесто исполнети со вода.
Нашето интересирање за кањоните датира од пред повеќе години, кога за прв пат се сретнавме со кањонот на Тресонечка река и прекрасните водопади, кога беше совладан еден од нив. Подоцна наши членови зедоа учество во совладувањето на еден кањон во Романија, за конечно сега да се создадат технички и финансиски можности за промовирање на овој многу силен по доживување спорт.
Во Македонија постојат повеќе кањони низ кои протекуваат планински реки испрекинати со прекрасни водопади. Овие непознати природни убавини треба, секако, да се промовираат за нашата и светската јавност да дознаат за скриените природно убавини што ги има нашата земја.

КАЊОН-СПОРТ НА СМОЛАРСКИ

Пристап: Се оди од Скопје (М3 - М1) преку Штип (М5) и Струмица (М6), по патот кон Бугарија (М6) и граничниот премин Ново село, вкупно околу 200 км.
По Струмица, околу 35 км, се врти десно кон селото Смоларе (3 км).
Во средината на селото, кај двата јавора кои се природна реткост и заштитени со закон, завршува асфалтниот пат и се оставаат возилата. Оттука се оди 20-тина минути по макадамски пат кој води кон планината (може и со возило околу 1 км). На патот има табла и патоказ кон водопадот. Оттука започнува уредена патека со 300 скали, патеки и оградени простори. Уште 20 минути и веќе сте на местото за разгледување под самиот водопад.
Некаде на половина пат, на една кривина, има проширување. Тука има патека по која за 10 мин. се доаѓа над водопадот. Веќе се наѕира реката Ломница , на 30 метри под патеката. Се фиксира јаже 30 метри и се спушта до реката и едно големо дрво. Се фиксира на дрвото и се осигурува за да се помине преку реката, да се дојде на спротивната страна до исфрлената карпа каде има набиено два бор-клина.
Напомена: Клиновите мора да бидат дополнително осигурани до дрвото или со други клинови поврзани меѓу себе.
Правецот е добро одреден, така што може да се избира дали ќе се спушта покрај водопадот или во него (во водата директно). Глетката и доживувањето се импресивни.

Враќање: По истата патека назад 30 минути до селото, до двата јавора.
Димензии: Должина 100 метри.
Број на каскади: 2
Најголема каскада: 50 метри
Висинска разлика: 70 метри
Време: Пристап 20 мин. плус 20 мин. до позиција над водопадот
Спуштање: Од 20 мин. до 2 часа
Враќање: 30 мин.
Период: Најверојатно низ целата година
Опременост: Добра. Два клина (на почетокот од водопадот потребно е дополнително осигурување на клиновите)
Потребен материјал: Јажиња, едно од 30 метри за пристап, две по 30 метри за дополнително осигурување на клиновите, две по 50м за спуштање, едно од 80м за осигурување (по потреба)
Тежина: Добра
Оценка: *** (лизгаво)
Коментар: Декорот е апсолутно фантастичен
Напомена: Местото е погодно за промовирање на овој спорт.

Посетители на Смоларскиот водопад во исчекување атракцијата

Абзелување низ водопадот во двојка

Поглед на членовите на „Пеони“ од страна

При крај со спуштањето

Задоволство по успешниот абзел

Како за крај - Средување на опремата

Текст и фотографии од списанието „Корав“
16.03.2008 год.

Статии со слична содржина:

* ТРЕСОНЕЧКИ КАЊОН