МАКЕДОНСКО-СЛОВАЧКА СПЕЛЕОЛОШКА ЕКСПЕДИЦИЈА „КАРАЏИЦА 2008“

И оваа година, во соработка со спелеолозите од Словачка, ќе организираме Македонско - Словачка спелеолошка експедиција „Караџица 2008“, со цел да се истражува новата јама откриена во 2006-та година и истражена до длабочина од 220 метри во минатогодишната експедиција. Оваа јама може да не одведе до непознати длабочини и простори под планината Караџица и масивот Јакупица.
Експедицијата ќе се реализира во првата половина на септември оваа година, со учество на десетина Македонски и Словачки спелеолози, кои ќе истражуваат десет дена со цел да навлезат што подлабоко во непознатите простори.
Поради далечината и непристапноста на просторот, пристапот до јамата ќе биде многу сложен. Имено за околу 5 часа возење со теренски возила би се транспортирале од Скопје преку Драчево за Караџица и Горно Бегово, до над изворот на Кадина река. Тука би ја претовариле на коњи дел од опремата за спуштање, храната и базниот камп, а личната опрема би ја понеле сами. За околу 4 часа по добри временски услови би биле во близина на јамата каде би го поставиле базниот камп.
Ова е неопходно поради оддалеченоста на јамата и тешкиот пристап. Транспортот и формирањето на кампот може да потрае и до следниот ден. Дури третиот ден евентуално четвртиот, по претходно извршени припремни работи, би се почнало со експедициско напредување во јамата.

Влегување во јамата во минатата експедиција

Поглед одвнатре

Меѓу вертикалните ѕидови од карпи и мраз

Напис и фотографии: Иван Жежовски
16.03.2008